Yon Ti Istwa (Mwen Pa Janm Sezi Konsa)

Yon Ti Istwa (Mwen Pa Janm Sezi Konsa)

Mwen leve maten an
De pye-m anfle, pat mwen fini.
M' gade nan miwa, mwen sote:
Sou figi mwen ki sanble mò-an-vakans.
Mwen pran lari a konsa
Pou-m al chache bous mwen ki te pèdi yèswa.
Yon motosiklèt pèdi direksyon,
Li pase sou pye goch mwen;
Ak pye anfle a, m' pa menm gentan kouri!
Mwen rive na ba a, mwen paka jwenn bous la.
Sou lòt bò lari a, je-m tonbe sou Rosie.
Li gade mwen li souri.

Tounè boule-m... Jounen an byen kòmanse.

~Stanley Pousyè Dore

Grangou pa mizo

Grangou pa mizo
Men nonm nan resiye li;
Nenpòt jan sa pase, li pap revandike.
Alarive. L' ap kilbite deyè alarive;
Li fè vi li ap fè lago.
Granmoun tounen timoun,
Y'ap fè sak' fini anvan ede lòt.
Sikonstans toufe fyète,
Figi nèg tounen kwi pòv kwabosal.
Nèg ak mizè tankou timoun menm lakou;
Pousyè, fatra tankou papye jwèt kalòt,
Dimanch aprè-midi degize ak souvètman viris,
Tout moun ap woule yon pajewo anbarasman.
Epoutan-
Grangou pa mizo;
Grangou pa chèn;
Nonm nan gentan resiye li.


~Stanley Pousyè Dore

Granmoun

Granmoun
Moun fou
Plezi
Desizyon
Tankou sous ki pete kote li vle
Chak moun gen yon reyalite
Menmsi tout nan menm aktyalite

Zandolit kou lòt bèt yo
Toutouni
Yo pa konn tèt yo
Zannimo kouri ak libète
Yon kochon raboure
Bèf bay lemond tete
Poul bay ze san fòse
Pami tout vivan yo
Se sèl lèzòm ki ap brete
Menm bliye sa li dwe ye

~Stanley Pousyè Dore

Granmoun bò lakay tate timoun chofe

Granmoun bò lakay tate timoun chofe
Tankou poul ki ap kondase
Kwèk-kwèk-kwè-dè
Kwèk-kwèk-kwè-dè
Ak dwèt madichon yo

Timoun bò lakay veye granmoun
Yon je fèmen, yon je ouvè
Pafwa nan tou pòt an tou klisad
Yo wè definisyon sisway

Yon sèl chanm kay
Yon fenèt gwo gòchèt
Ki ap tranble lè granmoun tire manchèt
Kijan pou nou pa konnen lalyèt satiyèt?
Teke kote ki pi dous la tèk tèk
Souke ayayay ayayay anba pay
Anba kabann, anba chal
Timoun yo pèdi bonè

Nan chache plezi nan sa nou wè
Pafwa nan sa nou tande
Gwo vant ak vant mare tonbe
Pwòblèm ki mande ponmpèz
Pou yon nouvo timoun oubyen nou menn pa malè

-Stanley Pousyè Dore

Pete

Pete yon blad
Pete yon boul
Eklate yon kawotchyou
Pete yon mi
Pete filè tifi
Pete pòt kouri
Pete an kachèt
Pete sou grandèt
Pete chit pete bwèt
Malgre tou sa a, nou pete ak revè
Tankou moun ki krache anlè
E lèzòm plis fè granfrè pete
Sou salon lòt moun k'ap reve

Nou Ka Bwè Ankò

Genyen yon zongn ki kankan ou. 

Chak ou pike kwanna 

Genyen yon langn ki kenken ou. 

Nou mennen moun ki bo yo 

Lòt bò yon rivyè ki san dlo. 

Sa ki sou se moun ki lou. 

Sa ki fou se moun ki mou. 

Koukou mennen tèt li nan tou 

Paske li pa vle moun di li fou. 

An nou bwè pou tèt nou legè 

Devan kesyon wounouwounou. 

Mwen di: gen yon zongn ki kankan ou, 

Yon langn ki kenken ou 

Paske nou kannannan, nou san manman, 

moun pran nan zen 

Kleren ki fè nou bliye kesyon, 

Men li pa bay nou repons. 

Ou pa santi pikan zongn nan tchik tchik 

Nan kwannan ou, 

Frekan langn nan bla bla tla 

Anndan kan ou. Apre somèy, men pwoblèm yo 

Ap mande solisyon; 

Ou bwè Ankò. 

Stanley (Pousyè Dore)

M'ekri moso sa a, pandan map bwè.

Gade bote 'kreyol pale, kreyol...' ladan li.

Pa Pale Kreyòl Sou Moun

Moun pa pale kreyòl sou moun. 

Yo pa dwe di sa ki ap vini 

Paske bouch yo paka pwononse fiti. 

Yo pa dwe pale kreyòl devan timoun, 

Si nou pa vle pèdi tifi 

Nan janm ti gason tèt yo pati 

Lè yo tande souf ti bouboun. 

Sant bouch ak kreyòl soti 

Frape ekselans ak egri 

San patipri pou gwo zouzoun. 

Kreyòl se pa pou moun ekri 

Paske li pa yon langn moun li 

Eksepte pou chante Choukoun.  

Se kilti a ki fè pwezi 

Nan langn fransè nou san mezi 

Tankou tèt dyòl ki ap souse foufoun, 

Vye ti machann magi 

Ki gen bon gou sapoti 

Nan fènwa magwouye magwouy moun. 

Foufoun de pye anlè, tèt chouchoun. 

Ou pa dwe pale kreyòl sou moun (non) 

Si ou pa vle mouri pann. 

Si ou ap di pawòl sou yon moun, 

Klète kreyòl ka fè ou vann.  

Paske lè Kreyòl pale, kreyòl konprann. 

- Stanley Baptiste (Pousyè Dore)

Ayiti

Peyi  

Vwazin vicieuse 

Fanm capricieuse 

Gason menteur 

Kè tambou 

Souf radio 

Ak pye poussiere 

Je telescope 

Zòrèy jako 

Ak dwèt pèpè 

Trip Map Trip Ayiti 

Pafwa m rete m ekri bagay sa yo, 

M pa konn si yo pwezi si yo betiz; 

Men mwen konnen mo yo pentire 

Bagay anpil moun lakay ap viv; 

Se sak fè m pa panse ak gramè tou.

BaSha L 2Zanj