Mwen damou

Tout moun pa wè etwal lajounen; 

Se avèg ki wè lwen. 

Lanmou ou mechan 

Enpasyan, 

Mwen bouke dòmi san ou. 

Lanmou se pa filozofi; 

Tout sa mwen kwè se ou.  

Si mwen te avèg, fòk ou ta kè mwen. 

Si mwen te likid, fòk ou ta vèso mwen.  

Kòm yo di lanmou avèg epi mwen wè ou, 

Li lojik si mwen rele ou etwal.  

Lanmou se matematik, 

Mwen menm avèk ou se youn. 

Tele Rèv Mwen

Mwen anvi voye tè 

Nan je ou, kache, fè ou pè.  

Nan je mwen pou ou wè lè;  

Gade segond ap fè ou gè; 

Paske mwen te mèg lè mwen te kite ou.  

Mwen anvi leve rad ou 

Pou m gade katye grad ou, 

Fouye dwèt, goute nap ou. 

Paske lontan, anyen pat kamarad ou. 

Lè mwen desann avyon an, 

Lage tye ou nan van an 

Pou pousyè di mwen onè zanti, 

Kè mwen repon respè janti.  

O! Ayiti ou se fanm yo tate kouri 

Yo di ou bay fasil, voye rapid 

Sant mango anban nannan ou, 

Flèch kann, flè machann aleken, 

Mèch fanm limen, jouda madan vwazen, 

Ak sant lwil boukannen fè tete ou 

Yo fè tele rèv mwen.  

Mwen anvi ou.