Ayiti

Peyi  

Vwazin vicieuse 

Fanm capricieuse 

Gason menteur 

Kè tambou 

Souf radio 

Ak pye poussiere 

Je telescope 

Zòrèy jako 

Ak dwèt pèpè 

Trip Map Trip Ayiti 

Pafwa m rete m ekri bagay sa yo, 

M pa konn si yo pwezi si yo betiz; 

Men mwen konnen mo yo pentire 

Bagay anpil moun lakay ap viv; 

Se sak fè m pa panse ak gramè tou.

BaSha L 2Zanj

Fòk Ou Pa Bliye

Fòk ou pa bliye mond lan egziste. 

Fòk ou pa bliye pil moun ki egziste; 

Chak gen yon istwa, chak gen yon mevèy. 

Lè ou ap mache ou pile yon fèy, 

Se pa atè a li te toujou ye.  

Se presans oubyen absans yon fòs 

Ki te deploge li nan yon pye. 

Van an vire li tankou yon elis san fòs 

Pandan fòs latè ap fè li tonbe. 

Fòk ou pa bliye 

Ki jan li te fè bèbèl 

Anvan li rive sou rout pye ou.  

Fòk ou pa bliye konbyen moun ou renmen 

Ou pa janm aproche.  

Fòk ou pa bliye 

Ou antoure ak plis lanmou ke rayiman; 

Paske pye bwa yo pa ka rayi. Epi 

Entèdepandans fè ni bèt ni moun bezwen ou.  

Fòk ou pa bliye tou  

Menmsi ou ta ap reve sa ki antoure ou yo 

Ou menm ou egziste kanmèm.

BaSha L 2Zanj